Նորություններ
Տպել

 

Հուլիսի 4-ին մեկնարկեց Սփյուռք ամառային դպրոցի Հայերենի արագացված ուսուցման դասընթացի «Ռուսախոսների խմբի» առաջին դասը: Մասնակիցները ծանոթացան միմյանց և դասավանդող դասախոսի՝  Նառա Սագսյանի հետ: Առաջին դասին մասնակիցները սերտեցին Մաշտոցյան այբուբենի մի մասը և զարգացրեցին իրենց հաղորդակցման հմտությունները: Դասընթացի ժամանակ մասնակիցները հաղոդակցվում էին հայերենով:

 Խմբի անդամներից Վիկա Մկրտչյանը արդեն չորրորդ անգամ է այցելում Հայաստան, նա նաև «Արի տուն» ծրագրի մասնակիցներից է եղել: Շատ է ուզում սովորել հայերեն, որովհետև ըստ նրա ամեն հայ պետք է իմանա իր հարազատ լեզուն, խոսի և գրի հենց մայրենի լեզվի միջոցով:
 «Հայոց լեզվի իմացությունը շատ կարևոր է մեզ համար, որպեսզի հաջորդ սերնդին փոխանցենք մեր լեզուն, որը կպահպանեն և իրենց հերթին կփոխանցեն սերնդեսերունդ», - նշում է նա:
 Տասներկուամյա Մարիամը խմբի ամենափոքր մասնակիցն է, նա ասաց, որ վաղուց էր երազում սովորել հայերեն և այժմ նման հնարավորություն է ստացել: «Կարծում եմ՝ յուրաքանչյուր հայ պետք է խոսի հայերեն: Ես ուրախ եմ, որ այս ծրագրի մասնակիցներից եմ, ինձ համար հետաքրքիր և հաճելի է այս միջավայրում հայերեն սովորելը» - ընդգծեց Մարիամը:
 Դասախոս Նառա Սարգսյանը իր խոսքում նշեց, որ օտար երկրում լեզուն պահելը շատ դժվար է և ծրագիրը նպաստում է մասնակիցների լեզվամտածողության ձևավորմանը: Առաջին դասից ստացած տպավորությունները դասախոսը գնահատեց դրական: «Ուրախալի է, որ մասնակիցները ցանկություն ունեն և պատրաստակամ են հայերեն սովորել: Ամենակարևորն այս դեպքում նրանց ազգային ինքնության պահպանման բարձր գիտակցությունն է, սա նշանակում է, որ դասերը արդեն իսկ հաջողված են»,- նշեց դասախոսը:
 Վերջում դասն ամփոփվեց մասնակիցների գիտելիքները ստուգող թեստով:
 
 
Նյութի հեղինակ՝  ՍԱԴ կամավոր Նանե Պետրոսյան
 

Վերադառնալ
ՀՀ, ք. Երևան,
ՀՀ սփյուռքի նախարարություն,
Վազգեն Սարգսյան 3,
Հեռ.` (+374 60) 50-08-30, (+374 10) 58-56-01 (700)
Երևանի պետական համալսարան,
Ալեք Մանուկյան 1,ԵՊՀ 2-րդ մասնաշենք, 5-րդ հարկ,
Հեռ.`(+374 60) 71 00 92
© ՍՓՅՈՒՌՔ ամառային դպրոց